Зависејќи од дарежливоста на минувачите за неговата секојдневна исхрана која се состои од остатоци, Томи изгледа очајно. Луѓето се собираат да го видат во неговиот „дом“ – мал кафез во близина на ресторан во прекрасните планини 60-тина километри северно од албанскиот град Тирана. Го снимаат со своите смартфони, позираат за селфи и му даваат слатки и грицки. Неговиот сопственик од време на време ќе му даде пиво за ја задоволи својата жед.
Расположението на мечката варира. Понекогаш, кога ќе намириса храна, ги собира шепите како да моли и гледа со надеж во муштериите. Понекогаш ја подава својата муцка преку решетките и го испружува јазикот, надевајќи се дека некој ќе го нахрани. Во други мигови тој нервоно шета во кафезот, а потоа следуваат напади на очај, кога си ги гризе екстремитетите и силно ја тресе главата.
Сопственикот на мечката вели дека ова однесување се должи на „здодевност“, но упорно тврди дека нема ништо лошо во тоа што Томи е заклучен 24 часа дневно. Пред две години Томи скитал по планините и шумите. Но, сопственикот на ресторанот дошол на идеја да ја затвори мечката и да ја оттргне од природната средина со цел да привлече повеќе муштерии. Тој му платил на ветеринар кој го уловил Томи со пушка за успивање.
Успиено, огромното животно било донесено во ресторанот и ставено во кафез 6 на 3 метри. И згора на тие маки, во близина се наоѓа контејнер контејнер со вода и пастрмки за ресторанот, кадешто мечката може да ги намириса. Се смета дека во Албанија има околу 80-тина мечки кои се заробени во близина на ресторани со цел да привлечат муштерии.
